Konfindustria mbështet dhe vlerëson si ngjarje me rëndësi strategjike themelimin e Bursës Shqiptare të Energjisë/ALPEX dhe kërkon fillimin sa më të shpejtë të punës me kapacitet të plotë. Bursa e energjisë, para së gjithash, krijon kushtet për rritjen e tejdukshmërisë së prokurimeve shitje-blerje dhe luftën kundër korrupsionit të kompanive publike të energjisë. Përllogaritet, se dëmi i ardhur nga problematikat e korrupsionit në prokurimet e energjisë elektrike në Shqipëri shkojnë në mbi 20% të vlerës së plotë të transaksioneve. Gjendje e ngjashme është edhe në Kosovë.

Fillimi i punës së Bursës është me vonesë të papërligjur me mbi 5 vite me ndikim të qartë të grupeve klienteliste të vendit dhe të rajonit përfituese të interesuara. Tregu i energjisë elektrike është një nga më strategjikët në ekonominë kombëtare me mbi 5% të PPB dhe me norma përfitimi mjaft të mëdha. Vetëm në vitin 2022 qeveria e Shqipërisë financoi me mbi 500 milion euro blerjen e energjisë elektrike, përveç burimeve të veta të kompanive publike.

Rëndësia e ALPEX rritet ndjeshëm, nëse vlerësojmë, se është edhe i pari institucion publik i përbashkët Shqipëri, Kosovë. Të dy shtete shqiptare janë të vetmet në Rajon, që nuk kanë patur bursë të energjisë.

Korrupsioni dhe keqmenaxhimi në shitje blerjet e energjisë elektrike nga kompanitë publike, janë ndër arsyet e rëndësishme të kalimit deri në shpalljen zyrtare të krizës energjitike pikërisht në vitin 20021, kur prodhimi vendor tejkaloi me mbi 6% nevojat e vendit. Gjithashtu, mungesa e bursës ndikon negativisht në kostot e furnizimit me energji elektrike të industrive dhe bizneseve, duke u bërë pengesë serioze edhe për liberalizimin e tregut.