Konfindustria i kërkon qeverisë, që në kushtet
e gjëndjes së krizës së shpallur energjitike, të marri masat për të vënë në
gjëndje pune sa më shpejt TEC-in e Vlorës. Gjithashtu, është e rëndësishme të
kuptohet, se përse dhe cilët janë agjensitë publike dhe individët përgjegjës të
mosvënies në funksion deri tani.
Prodhimi i energjisë elektrike nga TEC- Vlorës
me fuqi të instaluar afër 100 MGw do të shmangte plotësisht sjelljen e anijeve
gjeneruese nga Bangladeshi, që do ti kushtojnë taksapaguesve shqiptarë mbi 70
milionë $USA, përvec dëmeve të mëdha mjedisore shoqëruese të tyre.
Mbajtja në “ konservim” dhe jo në gjëndje pune
e TEC-it i kushton më shumë se 1 milion $/vit buxhetit i KESH.sha. duke u
përcjellë drejtëpërdrejtë në rritjen shtesë të çmimit të energjisë elektrike
për bizneset dhe qytetarët shqiptarë.
Konfindustria vlerëson, se është e
papranueshme dhe e pashpjegueshme, që prej më shumë se 11 vitesh TEC-i Vlorës
është lënë jashtë funksionit dhe nuk prodhon energji elektrike për shkak të një
problemi teknik. Defekti teknik kushtonte më pak se 7 milion $USA, ose 10 herë
më pak se qiraja që do tu paguhet anijeve të Bangladeshit.
Asnjë përpjekje nuk u ndërmorr për të kthyer
në gjëndje pune TEC-in e Vlorës edhe pas shpalljes nga Kryeministri Rama të
gjëndjes së krizës energjitike në vitin 2021 dhe në vazhdim.
|