Konfindustria, duke vleresuar si një çast historik
hapjen e negociatave të antarësimit në BE, kërkon nga ekzekutivi shqiptar
marrjen e gjithë masave politike, institucionale dhe profesionale për të mos përsëritur
gabimet e deritashme të proceseve të ngjashme me pasoja negative në afatgjatë për
ekonominë kombëtare, biznesin dhe qytetarët. Industritë dhe prodhimi vendor janë
viktimat kryesore të cilësisë së ulët të negociatave të deritashme.
Shqipëria ka përvoja jo të mira në historinë
30 vjecare të përfshirjes së saj në institucione ndërkombetare, sidomos të fushave
tregëtare, ekonomike dhe biznesit. Paaftësia institucionale, mungesa e përgjegjesisë
dhe interesi vetjak i politikës për të paraqitur si fitore thjesht nënshkrimin
mediatik të marrëveshjeve të antarësimit, kanë dëmtuar rëndë në mjaft raste
interesin publik. Përmëndim antarësimin pa studime fisibiliteti të humbje-përfitimeve
të Shqipërisë në Organizatën Botërore të Tregëtisë/OBT, CEFTA, etj.
Mbi të gjitha përmendim cilësine e ulët të
negociatave me shfaqje deri të korrupsionit “ state capture/kapje e shtetit” në
dëm të industrive dhe prodhimit vendor dhe përfitim të importuesve të lidhjes së
Marrëveshjes së Stabilizim Associjimit me BE, qe filloi efektet në vitin 2006. Pasojat
ishin tepër të rënda deri në falimentim për një pjesë të madhe të sektorëve të
prodhimit vendor, të industrive dhe bllokimit të zhvillimit të potencialeve
prodhuese të vendit.
Konfindustria vlerëson, se suksesi i zhvillimit
të negociatave për antarësim në BE nuk është vetëm firmosja symbylltas dhe me
kokën ulur te marrëveshjeve të shërbyera nga partnerët, por përftimi i dyanshëm
nëpërmjet gjetjes me dinjitet profesional dhe politik të sinergjisë të bashkëpunimit.
Cilësia e negociatave të antarësimit në BE janë të rëndësisë strategjike, sepse
do të kushtëzojë dukshëm zhvillimin e ekonomisë kombëtare dhe mirëqënien e
qytetarëve shqiptarë në afatgjatë.
|