Konfindustria, duke vlerësuar zhvillimet
gjeostrategjike në Ukrainë me ndikim afatgjatë në ekonominë botërore, kërkon
nga ekzekutivi ndëmarrjen e ndryshimeve rrënjësore të politikave fiskale dhe
institucionale në fushat kryesore të ekonomisë kombëtare, duke filluar nga
sektori i karburanteve.
Si masë e parë, Konfindustria kërkon nga
ekzekutivi të ulë barrën fiskale tepër të lartë të sotme në tregëtimin e
karburanteve dhe krijimin e Entit Rregullator të Karburanteve për ta përcjellë
uljen e cmimit te biznesi dhe qytetarët. Pagesat fiskale sot zënë më shumë se
55-60% të cmimit përfundimtar të shitjes. Shqipëria ka cmimin më të lartë të
karburanteve në rajon me një mesatare, që shkon deri në mbi 30% më shtrenjtë
nga vendet e tjera. Pasojat e cmimeve të larta të karburanteve, që rrezikojnë
të rriten më tej nga kriza e fundit Rusi-Ukrahinë si dhe cilësia jashtë
standarteve e tyre, janë dramatike për qytetarët, shkatërrimin e prodhimit
vendor, industrive, buxhetit të shtetit, mjedisit, shëndetësisë, etj. Barra tepër
e lartë fiskale e karburanteve favorizon kartelet në treg dhe kontrabandën në
nivele me dhjetra milionë dollarë në vit evazion fiskal.
Në këtë kuptim, Konfindustria i kërkon
ekzekutivit, që të ndërpresë menjëherë nismën e rritjes së fshehtë të tarifave me
70 milionë euro shtesë të koncesionit të metrologjisë së karburanteve.
Përpjekjet për dyfishim tarifash në përfitim të koncesionarit privat bëhen edhe
më absurde në kushtet e sotme.
Konfindustria vlerëson, se është e
domosdoshme dhe me rëndësi strategjike të kërkohet nga kompanitë plotësimi i
kushtit ligjor për 3 muaj rezerva te karburanteve dhe të bashkëpunohet për
shtimin e mëtejshëm të tyre.
|