Konfindustria vlerëson, se vendimi i fundit i Autoritetit të Konkurencës/AK për të mbikqyrur praninë e karteleve në tregun e karburanteve, ndonëse i mirëpritur, është tepër i vonuar në kohë dhe jep pak shpresa për të qenë efektiv për mbrojtjen e interesit publik.

Vendimi u ndërmorr vetëm pas kërkesës publike të përsëritur të Konfindustrisë për ngritjen e komisionit parlamentar për hetimin e rolit të munguar rregullator të Autoritetit të Konkurencës pas rritjes së menjëhershme në grup në nivel historik të cmimit të karburanteve. Kërkesa e Konfindustrisë u mbështet publikisht nga Presidenti i Republikës.

Konfindustria bën me dije, se sidomos duke filluar nga muaji shtator 2021 ka patur shfaqje të qarta dhe të përsëritura të pranisë së kartelit në tregun strategjik të karburanteve me mbi 1.5 miliard $ qarkullim vjetor. Vonesat e gjata mbi 4 mujore të ndërhyrjes në zbatim të detyrimeve ligjore të AK, janë krejtësisht të papërligjura, duke dëmtuar rëndë interesin publik, ekonominë kombëtare, biznesin dhe qytetarët shqiptarë.

Në të njëjtën kohë, vonesa e rradhës e ndërhyrjes si dhe historiku i dështuar i përballjes së AK në mbrojtje të interesit publik, vënë seriozisht në dyshim përfundimet e procesit hetimor ndaj sjelljes së fundit të operatorëve në tregun e karburanteve.