Konfindustria vlerëson se marrëdhëniet
ekonomike ndërmjet Shqipërisë dhe Kosovës janë në nivel të pakënaqshëm dhe
mjaft larg mundësive të pasurive natyrore, financiare, njerëzore si dhe
interesit kombëtar.
Në këtë kuptim Konfindustria mbështet
pjesën e programit politik të qeverisë së re të Kosovës të kryesuar nga Z.
Albin Kurti, në të cilën u theksua rëndësia e vecantë për rritjen e
bashkpunimit ekonomik ndërmjet dy shteteve shqiptare. Vecanërisht për tu
përgëzuar është paraqitja e projekteve të qarta të investimeve në sektorë
strategjikë si p.sh rruga Gjakovë – Shkodër, tregu energjitik i përbashkët,
etj.
Konfindustria vlerëson, se pavarësisht
takimeve dhe nënshkrimit të një numri të madh marrëveshjeve së bashkpunimit
ndërmjet qeverive të Shqipërisë dhe Kosovës, marrëdhëniet ekonomike dhe
tregtare në realitet kanë ardhur duke u vështirësuar në vite. Shumë marrëveshje
zyrtare të nënshkruara nuk janë zbatuar nga qeveritë respektive. Gjëndja e
pakënaqshme e marrëdhënieve ekonomikë të sotme dhe vonesat e ndërtimit të
Tregut të Përbashkët Shqipëri-Kosovë ka ardhur edhe nga mungesa e vullnetit të
vendimarrjes politike të lidhur dhe/ose ndikuar me grupe monopoliste të
biznesit.
Përplasjet dhe mosmarrëveshjet kanë arritur
deri në pika të nxehta, që kanë marrë pamjen deri të luftës tregtare ndërmjet
dy shteteve shqiptare. Përmendim përplasjet tregtare në fushën e disa
prodhimeve bujqësore, cimentos, agroindustrisë, etj. Kompanitë shqiptare nuk
kanë qenë në gjendje të pëfitojnë edhe nga vendosja e taksës mbi prodhimet me
origjinë nga Serbia nga qeveria e Kosovës.
|