Konfindustria

Konfindustria shpreh shqetësimin për mosarkëtimin në buxhetin e shtetit të mbi 115 milionë euro të të ardhurave të parashikuara në periudhën janar-nëntor 2019. Shuma e mësipërme përbën një deficit në nivelet më të larta historike. Gjendja bëhet edhe më shqetësuese duke patur parasysh se afër 53 milion euro ishte mosrealizimi i të ardhurave vetëm për muajin nëntor 2019. Kahu negativ i mësipërm mund ta cojë deficitin vjetor të të ardhurave deri në nivelin e 150 milion euro. Konfindustria vlerëson, se rënia e fortë e të ardhurave buxhetore të parashikuara është e lidhur së pari, me uljen e fortë në afërsisht gjysmën e ritmit të rritjes ekonomike PBB/Prodhimit të Brendshëm Bruto në vitin 2019 nga parashikimi qeveritar. Shkaqet e gjëndjes së mësipërme janë problemet thelbësore strukturore të ekonomisë, politika fiskale, financiare dhe buxhetore joefektive. Rënia e fortë e importeve/eksporteve, shkalla e lartë e emigrimit të popullatës, lëvizjet e tregjeve ndërkombëtare ndikojnë drejtpërdrejt në mosrealizimin e të ardhurave të parashikuara. Konfindustria vlerëson, se ndikim në rënien e të ardhurave buxhetore ka dhe menaxhimi në vazhdimësi i dobët nga agjensitë përkatëse fiskale me shenja të dukshme subjektivizmi, paaftësie dhe korrupsioni. Shembull i qartë për sa më sipër është edhe numri i lartë i përsëritjes së skemave kriminale me faturat e TVSH/Tatimit të Vlerës së Shtuar në shuma prej dhjetra milion euro të zbuluara. Një rol të dukshëm negativ, sidomos në rastin e skemave të mashtrimit me faturat e TVSH ka dhe sistemi i drejtësisë. Me përjashtim të shfaqjeve fillestare mediatike nuk ka të dhëna publike për dënimet e autorëve shtetërorë dhe privatë të lejimit dhe zbatimit në bashpunim të dhjetra rasteve të përsëritura të skemave mashtruese me psoja të rënda për buxhetin e shtetit dhe konkurencën në treg.